كيف تحقق اكبر استفادة من قراءة كتاب ؟!
كيف تحقق اكبر استفادة من قراءة كتاب ؟!
>هذه الخطوات اذا تم تنفيذها فستجد متعه خاصة للقراءة وهتستفاد جدا ان شاء الله
اولا : اشتري اجندتين وخصصهم للقراية بس ، وياريت كمان قلم للقراية بس:)
– الاجندة الاولي منهم
هتسجل فيها المعلومات اللي هتقابلك في الكتاب .. اي كلمة غريبة تقابلك سجلها .. مثلا وكان عم محمد يميل الي الفكر ” الماركسي ”
يبقي سجل عندك في الاجندة كلمة ” الماركسية ” وهكذا اي تاريخ مثلا او اسم لحاكم او لدولة . اي كلمة اول مرة تسمعها وحاسس انها غريبة عليك .
وعلي رواقة كده لما تفضي ادخل علي جوجل وابحث عن الحاجات دي
” الماركسية مثلا ” اعرف مين مؤسسها وايه فكرها ونشأت امته وهل هي حاجة حلوة ولا سيئة
وبعدين اكتب نبذة مختصرة عن اللي وصلتله ولو نص صفحة عنها وهتحس بفرحة علفكرة بعد ما تكتب اللي وصلتله عنها لان دي معلومات انت مجمعها ومش هتنساها
وانا بكتب الكلام ده حاليا بقرا كتاب ” كيف صنعنا القرن العشرين ” لـ روجيه جارودي
من الصفحة اللي انا واقف عليها طلعت الكلمات دي عشان ابحث عنها
” البروتستانت – بيكاسو – الماركسية – تشي جيفارا – ستالين – رومان رولان – الاشتراكيه)
شوف انت بقي لما تبحث وتعرف المعلومات دي من صفحة واحدة . اكيد هتستفاد جدا من الكتاب كله
– بالنسبة للاجندة الثانية
بعد ما تخلص الكتاب اجباري تعمل اللي هقلك عليه ده ، والا هتكون بضيع وقتك
بص يا سيدي .. في الاجندة التانية دي هتخليها لتلخيص الكتب بس .. ازاي ؟
هتكتب فيها بعد ما تخلص الكتاب
اسم الكتاب : ــــــ
اسم المؤلف : ــــــ
نبذه عن المؤلف : ـــــــ ولو حتي سطرين بس .. مثلا نجيب محفوظ
روائي مصري اتولد سنة 1911 وهو اول عربي حاز علي جايزة نوبل في الادب .. من اشهر اعماله الثلاثية و اولاد حارتنا وتوفي سنة 2006 .. بس ده يكفي smile رمز تعبيري ولو عاوز تكمل وتعرف اكتر مفيش مشاكل
” علفكرة نجيب محفوظ ده اسمه هو لوحده ـ اسم مركب يعني ”
بعدين تقييمك للكتاب : ــــــ كام من عشرة
نبذه عن الكتاب : ـــــــــ لخص قصة الكتاب في 5 سطور مثلا
اهم حاجة بقي ، نقدك للكتاب : ـــــ
بص حتي لو هو نجيب محفوظ نفسه انتقده . قول اللي معجبكش في الكتاب وهو هنا كتب تفاصيل كتير وهنا رد فعل البطل كان بارد والشخصية دي كانت ثانوية وهكذا .. واكتب الحاجات اللي عجبتك بردو .. ده هينمي عندك موهبتين .. اولا موهبة النقد والكتابة ( عن تجربة ) .. ثانيا هيخليك بعد كده تقرا بتركيز اكتر عشان مفيش تفاصيل تفوتك
وحاول تدخل علي موقع الجود ريدز لو انت محتار بين كذا كتاب يعني اعرف اراء الناس عنهم وانتقي الاحسن ما بينهم
– بس في حاجه لو انت في كتاب حددت انك خلاص هتقراه ياريت متدخلش علي الموقع وتقرا تعليقات الناس عنه .. لان لازم هتلاقي حد كاتب ده كتاب ممل جدا ومليان تفاصيل ومستفدتش منه وهكذا ف تلقائيا هتتقفل من الكتاب .. والعقاد مرة قال ليس هناك كتابا أقرأه و لا أستفيد منه شيئا جديدا ، فحتى الكتاب التافه أستفيد من قراءته ، أني تعلمت شيئا جديدا هو ما هي التفاهة ؟
في اول سنة قراءة ليك انت مش مطالب ب اكتر عن 10 كتب .. كتابين منهم علي الاقل في تخصص .. علمي مثلا او تاريخي او ديني …. الخ
وانت بتقرا خلي في اعتقادك دايما انك بتنفذ اول امر نزل علي سيدنا محمد ” اقرا ” وان اللي بتعمله ده عبادة وقربة لربنا عز وجل ..
واحمده انه من عليك بنعمة القراية ومد في عمرك للحظة اللي قريت فيها الكتاب ده
– وقل رب زدني علما 🙂
دمتم قراء مثقفين محترمين 🙂 <3
